K-woord video ten sterkste deur Kaapse Forum veroordeel
Kaapse Forum spreek sy diepe teleurstelling en afgryse uit oor die video wat tans op sosiale media die ronde doen met ’n jong (bruin) dogter wat ’n rassistiese uitspraak teenoor (swart) mede-leerders maak. “Ons veroordeel dit ten sterkste,” sê Heindrich Wyngaard, Kaapse Forum-voorsitter.
Ons het kennis geneem daarvan dat die voorval by die Hoërskool Knysna in die Suid-Kaap plaasgevind het. Dit is ’n gemeenskap waar ons reeds betrokke is met onder meer veiligheidsinisiatiewe. Kaapse Forum waardeer die deursigtigheid waarmee die prinsipaal, Mark Mosdell, die kwessie hanteer – onder meer deur die brief wat hy aan ouers en leerders gerig het. Hierin keer hy enige vorm van rassisme af.
“Ons organisasie glo in wedersydse respek en erkenning van Suid-Afrika se diverse kulturele samelewing. Ons kan daarom nie enige vorm van disrespek of gewoon rassistiese optrede – ongeag deur wie – van een groep teenoor ’n ander goedpraat nie,” sê Wyngaard verder. “Wanneer die beweerde oortreding so erg is soos die gebruik van die k-woord deur ’n leerder, behoort daar met dieselfde erns en strengheid daarteen opgetree word.”
Wyngaard sê Kaapse Forum se hoof fokusarea is opvoeding. Die organisasie gaan daarom die skool nader met ’n aanbod om werkswinkels vir senior leerders te hou waardeur hulle kultuursensitiwiteit aangeleer kan word. Kaapse Forum glo nie dat dit genoeg is om net die insident te veroordeel nie, maar dat iets daaraan gedoen moet word.
“Ons grootste vrees is dat die kwessie as ’n uitsondering gehanteer sal word, terwyl die rassistiese sentiment dalk onder meer leerders teenwoordig mag wees,” sê Wyngaard. “Ons is ook bekommerd oor die oorsprong van die leerder se uitspraak en versoek die ganse skoolgemeenskap – leerders, ouers, onderwysers, personeel en plaaslike leiers – om te help met die opvoedingstaak.”
Dié opvoedingstaak is volgens Kaapse Forum om rasse-vooroordeel teen te werk en maatskaplike samehorigheid op alle vlakke van die samelewing te bevorder. Dit is veral belangrik in die konteks van die naderende viering van Erfenismaand, glo ons.
