DNS-agterstand bewys dat SAPD onbevoeg is
Die voortdurende versuim van die Suid-Afrikaanse Polisiediens (SAPD) se forensiese wetenskap-laboratorium om die agterstand in die prosessering van DNS-bewysstukke uit die weg te ruim, is ’n bewys dat wanbestuur, onbevoegdheid en blatante verontagsaming van geregtigheid die norm in Suid-Afrika se polisiëringstrukture geword het. Hoeveel slagoffers van verkragting en geweldsmisdaad moet geregtigheid geweier word terwyl misdadigers tans vryelik loop, vra Kaapse Forum.
Die DNS-agterstand – wat nou meer as 140 000 sake oorskry – is vandeesweek tydens die portefeuljekomitee oor polisie se vergadering bekend gemaak. Hierdie situasie is niks minder as ’n nasionale skande vir Suid-Afrika nie. Dis ’n verdere vernedering van die land se reeds besmette internasionale beeld en ook plaaslike vertroue in die regering.
Daar moet ondersoek ingestel word na die hoofoorsaak van hierdie agterstand om uiteindelik daardie probleem uit te roei. Kaapse Forum ondersteun dus Ian Cameron, voorsitter van die portefeuljekomitee oor polisie, se versoek aan die kantoor van die ouditeur-generaal om ’n volledige forensiese oudit na die SAPD se DNS-prosessering- en forensiese wetenskap-laboratoriums te doen, asook om toe te sien dat kontraktebestuur korrek toegepas word.
“Hoeveel meer leë beloftes moet ons nog verduur voordat diegene in beheer werklike gevolge vir hul mislukking in die gesig staar? Die feit dat kritieke forensiese toerusting ongebruik bly weens dienskontrakte wat verval het, is ’n skokkende aanklag van die SAPD se onvermoë om selfs die mees basiese administratiewe take uit te voer. Die beskuldiging van verraad is die afgelope paar dae baie los rondgegooi, maar as daar gekyk word na die swak bestuur by die SAPD forensiese wetenskap-laboratorium kan daar gevra word of die probleem in Suid-Afrika nie by die regering self lê nie. Met die ANC wat steeds beheer oor die SAPD binne die regering van nasionale eenheid behou, is dit dus geen verrassing dat die onlangse Februarie 2025-peiling deur die Sosiale Navorsingstigting wys dat die steun vir die ANC tot rofweg 32% gedaal het nie,” sê Bernard Pieters, Kaapse Forum se hoof oor Gemeenskapsaktivering.
“Hierdie krisis gaan nie net oor burokrasie nie – dit gaan oor lewens, regte mense en nie net getalle op ’n spreiblad nie. Elke vertraagde DNS-resultaat verteenwoordig ’n slagoffer wat wag vir geregtigheid wat dalk nooit sal kom nie. Die parlement en toesighoudende liggame moet beslissend optree en diegene wat verantwoordelik is, moet aanspreeklik gehou word. Suid-Afrikaners verdien ’n regstelsel wat vir almal werk; nie een wat misdadigers beskerm nie,” sluit Pieters af.
Raak vandag nog by Kaapse Forum betrokke en help om ’n verskil te maak. Stuur ’n e-pos aan info@kaapseforum.co.za of sluit aan by www.kaapseforum.co.za.
