Noord-Kaapse SAPD se besluit om verklarings slegs in Engels af te neem ongrondwetlik – Kaapse Forum
Die Suid-Afrikaanse Polisiediens (SAPD) in die Noord-Kaap se besluit om voortaan verklarings slegs in Engels af te neem is heeltemal teenstrydig met artikel 6(3)(1) van die Grondwet wat bepaal dat provinsiale regerings ’n minimum van twee amptelike tale moet gebruik. Volgens Kaapse Forum gaan hierdie besluit ook teen die bruin gemeenskap, wat merendeels Afrikaans is, diskrimineer. Die bevel is op 12 Maart deur generaal-majoor Luntu Ngubelanga, adjunk-provinsiale kommissaris van die Noord-Kaap, onderteken en bepaal ook dat dissiplinêre stappe lede in die gesig staar indien dié reël nie nagekom word nie.
Voorts is hierdie nuwe reël ook teenstrydig met die Wet op die Gebruik van Amptelike Tale (12 van 2012) wat bepaal dat nasionale departemente, soos die SAPD, van minstens drie amptelike tale gebruik moet maak. Hierdie proses om slegs van Engels gebruik te maak is reeds in 2016 sonder sukses getoets. Kaapse Forum het reeds in gesprek getree met verskeie rolspelers oor hoe hierdie saak op gemeenskapsvlak uitgeklaar kan word.
“Hierdie optrede wys dat leierskap in Suid-Afrika heeltemal toondoof is vir wat in die wêreld aangaan. Suid-Afrika is reeds weens sy rassewette en houding jeens minderheidsgroepe onder die vergrootglas en dan dink die SAPD in die Noord-Kaap dat dit wys is om Engels sy dienstaal te maak al is daar volgens die 2022 sensus slegs 2,4% van die Noord-Kaapse bevolking wat Engels as huistaal praat,” sê Bernard Pieters, hoof van Gemeenskapsaktivering by Kaapse Forum.
“Engels is waarskynlik ook nie die polisielede aan diens se eerste taal nie, wat ook die moontlikheid vir die afneem van foutiewe verklarings verhoog. Foute wat tydens die vertaling van verklarings inglip kan daartoe lei dat verklarings uitgegooi word of dat belangrike inligting oorgesien word. Gemeenskappe moet waar moontlik toegelaat word om in hul eie moedertaal verklarings te kan aflê om te verseker dat inligting akkuraat oorgedra word en dus meer suksesvol opgevolg kan word,” sluit Pieters af.
Raak vandag nog betrokke by Kaapse Forum en help om ’n verskil te maak. Stuur ’n e-pos aan info@kaapseforum.co.za of sluit aan by www.kaapseforum.co.za.
