Verblydend dat Noord-Kaapse polisie besluit herroep om verklarings slegs in Engels af te neem

Kaapse Forum het vandag verneem dat die Suid-Afrikaanse Polisiediens (SAPD) in die Noord-Kaap sy besluit teruggetrek het om verklarings slegs in Engels af te neem. Die oorspronklike besluit was heeltemal teenstrydig met artikel 6(3)(1) van die Grondwet, wat bepaal dat provinsiale regerings ’n minimum van twee amptelike tale moet gebruik. Kaapse Forum is in besit van ʼn dokument waarin die provinsiale kommissaris hierdie besluit terugtrek.

“Dit is verblydend dat goeie oordeel geseëvier het en dat hierdie besluit herroep is. Hierdie reël sou ʼn wesenlike negatiewe impak gehad het op gemeenskapsvlak, daarom verwelkom Kaapse Forum die besluit om dit terug te trek. Dit wys weereens die mag van gemeenskappe wat saam mobiliseer om druk toe te pas,” sê Bernard Pieters, hoof van Gemeenskapsaktivering by Kaapse Forum.

Kaapse Forum hou vol dat toegang tot die SAPD  verbreed moet word en dat ander taal gemeenskappe hierdie as ʼn platform moet gebruik om ander minderheidstale te bevorder.

“Engels is waarskynlik nie die polisielede aan diens se eerste taal nie, wat ook die moontlikheid vir die foutiewe afneem van verklarings verhoog. Foute wat tydens die vertaling van verklarings inglip kan daartoe lei dat verklarings uitgegooi word of dat belangrike inligting oorgesien word. Gemeenskappe moet waar moontlik toegelaat word om in hul eie moedertaal verklarings te kan aflê om te verseker dat inligting akkuraat oorgedra word en dus meer suksesvol opgevolg kan word,” sluit Pieters af.

Raak vandag nog betrokke by Kaapse Forum en help om ’n verskil te maak. Stuur ’n e-pos aan info@kaapseforum.co.za of sluit aan by www.kaapseforum.co.za.