Wes-Kaapse polisie bevestig skriftelik die gebruik van Afrikaans by polisiekantore aan Kaapse Forum

Afrikaans mag wel gebruik word met die aflê van verklarings by die Wes-Kaapse Suid-Afrikaanse Polisiediens (SAPD). Dít is deur lt.genl. Thembisile Patekile, Wes-Kaapse polisiekommissaris, aan Kaapse Forum bevestig. Kaapse Forum het aan Patekile geskryf ná die SAPD in die Noord-Kaap bevestig het dat hulle wel Afrikaans as dienstaal sal bied indien dit verlang word, die organisasie wou duidelikheid hê oor die gebruik van Afrikaans ook in Wes-Kaapse polisiekantore.

Volgens artikel 6(3)(1) van die Grondwet moet provinsiale regerings ’n minimum van twee amptelike tale gebruik wanneer hulle met die publiek te doen het. Patekile was dit eens met Kaapse Forum dat die publiek ’n amptelike taal waarmee hulle gemaklik is mag gebruik wanneer hulle verklarings aflê. Volgens Patekile is Engels slegs die “werkstaal” van die SAPD en is die gebruik van Engels slegs op SAPD-lede van toepassing en nie op die publiek nie.

Tydens ’n PanSAT-konferensie in Maart vanjaar is daar onder meer gesê dat daar ’n risiko is dat feite verdraai kan word en kan lei tot regsverydeling indien verklarings in Engels afgeneem word deur SAPD-lede wie ’n ander moedertaal het. Dit kan daartoe lei dat geregtigheid uiteindelik nie kan geskied nie.

“Dit is bemoedigend dat daar nou ’n skriftelike waarborg is vir die gebruik van Afrikaans by polisiekantore in die Wes-Kaap. Afrikaans en sprekers van ander tale moet die geleentheid gegun word om misdade tot die beste van hul vermoëns te rapporteer,” sê Bernard Pieters, hoof van Gemeenskapsaktivering by Kaapse Forum.

Raak vandag nog betrokke by Kaapse Forum en help om ’n verskil te maak. Stuur ’n e-pos aan info@kaapseforum.co.za of sluit aan by www.kaapseforum.co.za.